 |
Neni 7
Ndërmjetësimi
1. Shërbimi Kombëtar i Punësimit garanton, pa pagesë, ndërmjetësimin për punë për punëdhënësit dhe punëkërkuesit në të gjithë territorin e vendit. Shteti mbështet pajisjen dhe përgatitjen e posaçme të zyrave të punësimit, për të kryer ndërmjetësim për punë cilësore dhe efektive.
2. Zyrat e punësimit, në përcaktimin e kandidatëve për plotësimin e vendeve të lira të punës, u japin përparësi:
a) punëkërkuesve nga grupe të veçanta[3];
b) punëkërkuesve të papunë afatgjatë;
c) punëkërkuesve të tjerë.
3. Kriteret, që duhet të plotësojnë personat juridikë ose fizikë privatë për t’u licencuar për ushtrimin e veprimtarive në fushën e shërbimeve të punësimit, përcaktohen me vendim të Këshillit të Ministrave.
[1] Botuar në Fletoren Zyrtare nr. 22, datë 6 Nëntor 1995, faqe 949.
[2] Ligji nr. 7995/1995, është ndryshuar me:
- ligjin nr.8444, dt.21.1.1999, bot. Fletore Zyrtare 3, dt.22 Shkurt 1999, fq.30
- ligjin nr.8872, dt.29.3.2002, bot. Fletore Zyrtare 11, dt.18 Prill 2002, fq.320
- ligjin nr.9570, dt.3.7.2006, bot. Fletore Zyrtare 78, dt.26 Korrik 2006, fq.2233
- ligjin nr.10137, dt.11.5.2009, Fletore Zyrtare 86, dt.12 Qershor 2009, fq.3775
[3] Në mbështetje të pikës 20 të nenit 2 të ligjit nr. 7995/1995 termi “grupe të veçanta” përfshin punëkërkuesit, si: nënat me shumë fëmijë, personat me moshë mbi 50 vjeç, të rinjtë nën 18 vjeç, të papunët afatgjatë, personat nga familje nën nivelin e varfërisë, viktimat e trafikut, personat që përfitojnë nga programet e mbështetjes me të ardhura, personat që dalin të papunë nga ndërmarrjet dhe institucionet në proces reformimi, ristrukturimi dhe privatizimi, vajzat-nëna të papuna, femrat e divorcuara me probleme sociale, personat që kthehen nga emigracioni me probleme ekonomike, personat e sapodiplomuar, të paorientuar në tregun e punës, personat që kanë vuajtur dënimin me burgim, personat me aftësi të kufizuar, romët, jetimët që e kanë fituar këtë status.
