MARRËVESHJA NDËRMJET KËSHILLIT TË MINISTRAVE TË REPUBLIKËS SË SHQIPËRISË DHE QEVERISË SË REPUBLIKËS SË BULLGARISË PËR BASHKËPUNIMIN NË FUSHËN E LUFTËS KUNDËR TERRORIZMIT, KRIMIT TË ORGANIZUAR, TRAFIKIMIT TË PALIGJSHËM DHE AKTEVE TË TJERA KRIMINALE

Neni 1

Qëllimi

Palët Kontraktuese do të bashkëpunojnë në fushat e mëposhtme:

1. Lufta kundër terrorizmit:

– shkëmbimi i informacionit dhe rezultateve të përftuara nga hetimet për akte terroriste të planifikuara ose të kryera kundër krerëve të shteteve, personave nën mbrojtje ndërkombëtare, përfaqësuesve të ambasadave dhe konsullatave, nëpunësve të organizatave ndërqeveritare, si edhe pjesëmarrësve në vizita në nivel shtetëror dhe ngjarje të tjera politike dhe sportive lokale ose ndërkombëtare;

– vëzhgimi i mënyrës së veprimit të kriminelëve, metodave të financimit të aktiviteteve të lartpërmendura, organizatave terroriste, planifikimit ose kryerjes respektivisht të krimeve kundër interesave madhore të secilës prej Palëve Kontraktuese.

2. Lufta kundër krimit të organizuar, zbulimi dhe hetimi i personave dhe organizatave, që lidhen me:

– trafikimin e paligjshëm, prodhimin dhe përdorimin e paligjshëm të lëndëve narkotike dhe substancave psikotrope;

– trafikimin e paligjshëm të personave dhe shfrytëzimin e fëmijëve;

– trafikimin e paligjshëm të artikujve me përdorim të dyfishtë, materialeve bërthamore, pajisjeve dhe teknologjisë, armëve të zjarrit, municionit, substancave helmuese, eksplozivëve, si dhe pjesëve të tyre;

– krimet e lidhura me shfrytëzimin seksual;

– kontrabandën e gurëve të çmuar dhe metaleve të çmuara ose, gjithashtu, objekteve me vlera kulturore ose veprave të artit, që i përkasin pasurisë kulturore respektive kombëtare ose pasurisë kulturore ndërkombëtare;

– falsifikimin e dokumenteve, mjeteve monetare ose mjeteve të tjera të pagesës;

– kumarin e paligjshëm ose çdo lloj mashtrimi të përdorur në kumarin e ligjëruar;

– parandalimin, zbulimin dhe hetimin e makinave të vjedhura dhe trafikimit të tyre, si edhe krimet të cilat rezultojnë me shkelje të rregullave të trafikut rrugor;

– krimet kompjuterike dhe krimet kundër pronësisë intelektuale.

3. Lufta kundër korrupsionit, krimeve ndërkombëtare në ekonomi, si edhe kontrabandës, shmangies së pagesës së taksave, si edhe operacioneve fiskale dhe transaksioneve të tjera me para ose pronave që prezumohen se rrjedhin nga aktiviteti kriminal.

4. Lufta kundër migrimit të paligjshëm:

– lufta kundër migrimit të paligjshëm dhe kanaleve për trafikimin e personave;

– zbulimi i ofruesve të shërbimeve të transportit dhe agjencive turistike/të udhëtimit, të cilët marrin pjesë në aktivitetet që përfshijnë trafikun e personave;

– zbulimi i dokumenteve të udhëtimit të falsifikuara ose vizave të falsifikuara.

5. Palët Kontraktuese do t’i japin njëra-tjetrës asistencë në fushat e mëposhtme:

– organizimi dhe trajnimet e përbashkëta në lidhje me frenimin e krimit të organizuar dhe ndërkombëtar;

– organizimi dhe kontrolli i bazës së të dhënave që mbajnë kartat e identitetit;

– zhvillimi i metodave dhe sistemeve për përzgjedhjen, trajnimin dhe formimin profesional të ekspertëve nga të dyja Palët Kontraktuese, në fushat e përshkruara në paragrafin 1 të këtij neni.